曼联喺英超0比1不敌纽卡素，意外获派担任正选箭头嘅安东尼马迪尔，表现令人失望，佢更因为冇履行防守战术，比赛期间被坦哈格即时喺场边丧闹，但迪尔亦不甘示弱，摊开双手表现出对指责不满，随时会被小器嘅坦哈格打入冷宫。

马迪尔上场联赛对爱华顿有入波，今场意外取代海伦担正，但佢成个上半场都冇喺对方禁区内掂过波，更多次冇去看管纽卡素中坚法比安舒哈，其中一次法比安舒哈引球长驱直进制造攻门，几乎造就米基尔阿米朗入波後，坦哈格即喺场边破口大骂，而马迪尔亦出口还击，摊大双手以示不满。

踢到60分钟，马迪尔同拉舒福特率先被换走，负责评述嘅前纽卡素球星赞拿斯表示：「呢幕就系曼联依家嘅文化，大家都系摊大双手、互相指责，一啲团结都睇唔到。」大批网民亦留言：「马迪尔喺场上做过咩？」、「坦哈格又同另一个球员反面」、「唔该佢两个季尾一齐走」......