明年6月展开嘅欧国盃决赛周，周日(3日)凌晨喺主办国德国举行分组赛抽签，被视为夺冠热门嘅英格兰抽到上上签，成功避开一众名牌劲旅，不过衞冕嘅意大利就冇咁好彩，佢哋落入被视为「死亡之组」嘅B组，同组有西班牙同克罗地亚2大劲旅，争出线有恶斗。

喺外围赛8战6胜2和嘅英格兰签运一流，被编入C组嘅「三狮兵团」将会对塞尔维亚、丹麦同斯洛文尼亚，正常情况下好大机会首名出线。如果英格兰真系顺利拎到首名，16强会对其中一队「小组最佳第3名」，8强对手亦系其他小组次名，最快要到4强先会对小组首名出线球队。

有到场出席抽签嘅英格兰领队修夫基表示：「我哋参加过好多次抽签，每次感觉都系一样，比赛唔系纸上谈兵，我哋想避开某1、2支球队，但面对嘅对手大部份都好有实力。我哋好清楚国内球迷对英格兰嘅期望，球队亦做好准备去回应大家嘅期盼。」

今届抽签最瞩目系B组，意大利、西班牙同克罗地亚3大名牌都喺呢组，意大利同西班牙都系上届4强份子，准决赛交锋就要踢到互射12码先由意大利晋级。分组赛其余焦点对碰，D组荷兰同法国备受注目。2024欧国盃会喺明年6月14日开幕，揭幕战由德国对苏格兰，7月14日进行决赛。

欧国盃决赛周分组形势

A组●德国、苏格兰、瑞士、匈牙利

B组●西班牙、意大利、克罗地亚、阿尔巴尼亚

C组●英格兰、斯洛文尼亚、丹麦、塞尔维亚

D组●法国、荷兰、奥地利、附加赛A胜方

E组●比利时、斯洛伐克、罗马尼亚、附加赛B胜方

F组●葡萄牙、土耳其、捷克、附加赛C胜方