足球就像一出戏，教练系「导演」，球员系「演员」，真正主宰戏情发展嘅人，当然系球会班主。呢班「幕後主脑」有超级富豪、政治强人，甚至王室贵族，佢哋不计成本投入巨资，创造惊天转会交易，化腐朽为神奇打造超级劲旅，并捧红多位经典主帅及球星，成为改变世界球坛嘅英明老细。

强人贝鲁斯干尼领A米征服欧洲

意甲三大传统势力之一嘅AC米兰，喺1979/80年球季因为假波案被罚降落乙组，豪门一夜之间衰落，即使一年後重返意甲，但仅一季货仔又衰到降班，可以话系球队史上最黑暗时期。其後就算再上番甲组，但成绩都唔算理想，直至1986年2月，AC米兰史上最重要人物出现，意大利富豪贝鲁斯干尼正式收购「红黑兵团」，呢位传媒大亨独具慧眼，聘请当时年仅41岁的沙基执教，令球队踏上成功之路。

签入「荷兰三剑侠」实现复兴

当年意国传媒睇死A米班底弱，难有作为，沙基以抛出金句回应：「要成为一位骑师，唔一定要先拥有马匹。」AC米兰之後积极增兵，包括签入「荷兰三剑侠」古列治、列卡特及云巴士顿、以及本土球星邓纳东尼同安察洛堤，并喺1987/88年球季力压有马纳当拿助阵嘅拿玻里，捧走意甲冠军。

上世纪80年代後期至90年代，成个意大利球坛以至欧洲都属於AC米兰嘅世界，由1988至99年期间，赢过6次意甲及3次欧联冠军，曾经创出连续58场不败壮举，其中连夺1989及90年欧联冠军後，直至2017年嘅皇马，先再有球队可以达成衞冕欧联呢个难度极高嘅任务。

带挈政途任意国总理

贝鲁斯干尼创造「红黑王朝」震惊球坛，同时带挈个人政途发展，1994年当选意大利总理，2001再次获得宝座，2005年连任成功，2008年又再当选。「老贝」2017年出售AC米兰後，球队再次家道中落，直至近两季先有番起色。

阿布金元足球打造无敌战车

阿布拉莫域可以话系英超金元足球始祖，一手将财困嘅车路士变成顶级劲旅，入主19年期间赢过欧联、英超及世冠盃等共21座冠军，喺佢取得功成後，曼城及巴黎圣日耳门都有样学样，采取「银弹战术」颠覆球坛。

2003年阿布用1.4亿镑收购车路士，将球队逐步打造成「黄金战车」，期间向球会注资超过23亿欧元，引入嘅世界级球星不计其数，包括华朗、杜奥巴、洛宾、施治、舒夫真高、费兰度托利斯、夏萨特、法比加斯及卢卡古等。

要求甚高换帅唔手软

要求甚高嘅阿布换领队亦绝不手软，只要球队成绩唔理想，就会即时换帅，由最初嘅云尼亚里到现任杜曹，总共15次换帅，最具代表性系两度执教嘅摩连奴，佢为车仔首夺英超冠军登上「神枱」，其余领队如希丁克、安察洛堤、宾尼迪斯及干地，皆属顶级名帅。

不过自俄罗斯入侵乌克兰後，身为俄国总统普京「亲信」嘅阿布被英国制裁，连带车路士亦受牵连，运作都成问题，逼使佢宣布将球会卖盘。而车仔卖盘上周五截标，据报有多个财团入标竞投，但无论最终「车」落谁家，阿布都要黯然离开呢架佢一手打造嘅「黄金战车」。

将曼市「由红变蓝」 文梳亚入城创奇迹

上世纪80、90年代至千禧年初期，曼城只属於唔入流的英超「升降机」弱队，期间经历多次升降班，喺英超同英甲（当时未有英冠）之间浮沉，同同市球队曼联相比，简直不堪入目。

最大目标称霸欧联

不过2008年阿联酋阿布扎比王室成员文梳亚入主後，年年投入巨资改造球队，并迅速喺2010/11年赛季夺得英足盃冠军，打破长达35年嘅锦标荒，其後一季更首夺英超，自此成为欧洲顶级球队。期间球队吸纳唔少顶尖管理人才，包括挖角前巴塞隆拿足球总监碧格列斯坦、副会长苏里安奴，2016年更请来「战术大师」哥迪奥拿领军，「蓝月亮」从此走上盛世之路。

过去10年曼城绝对「财大气粗」，实际开支高达14.3亿镑，不断用银弹政策增兵，大肆收购阿古路、大衞施华及高柏尼等顶级球星，球队实力喺英超傲视同群。「蓝月亮」近4季英超3度封王，上届欧联首度杀入决赛，可惜最终不敌车路士，令到文梳亚「集邮」未能成功，今季继续朝呢个最大目标进发。适逢同市宿敌曼联喺「後费格逊年代」持续陷入低潮，文梳亚主政之下，曼城令曼彻斯特市「由红转蓝」，创造球坛奇迹。

皮里兹掌舵银河舰队 炮制6条A够经典

西甲豪门皇家马德里一向喺转会市场出手阔绰，踏入21世纪後，呢支「银河舰队」一次又一次用破纪录嘅转会费，收购球坛当红巨星加盟，一切惊世操作当然有赖会长皮里兹喺背後推波助澜。

每年1星政策吸引球迷

2000年皮里兹首次成功当选皇马会长，佢深明球迷锺意睇球星嘅道理，实行一年买入一位巨星嘅「烧钱」政策，吸引费高、施丹、朗拿度及碧咸等当时得令巨星来投，配合原有嘅鲁尔同卡路士，组成「6条A」金钻阵容，奠定「银河舰队」称号。

2009年皮里兹第二次当选会长，佢今次重金买入C朗、卡卡、宾施马同加里夫巴利等新一代球星，及後名宿施丹接掌教鞭，更成功实现欧联3连冠伟业。近年皮里兹又有新搞作，牵头联合欧洲各大豪门，推动成立欧超联，实行同日渐腐败嘅欧洲足协对着干，试图颠覆球坛，虽然最终失败收场，但无损其球坛巨人形象。

艾卡理化圣在手段高

中东富豪国家卡塔尔积极发展足运，焦点必定系今年冬天举办嘅世盃决赛周。卡塔尔足球「代理人」艾卡理化2011年收购法甲班霸巴黎圣日耳门（PSG），曾经引起球坛震动。艾卡理化虽然系PSG主席，但真正拥有PSG嘅系卡塔尔投资局，意味呢间球会实际上由「国家」控制。

欧超联风波选择撑UEFA

喺艾卡理化管理底下，PSG制造过唔少经典转会，包括2017年掟2.22亿欧元违约金，从巴塞隆拿「硬撬」尼马，紧接又以1.8亿欧元签入基利安麦巴比，今季又以超高人工吸引阿根廷球王美斯加盟，出手之阔绰震惊世界。

正所谓「枪打出头鸟」，欧洲足协（UEFA）曾经以「财政公平条例」调查PSG，但艾卡理化运用出神入化嘅财技，加上擅长走法律罅，令欧洲足协都无可奈何。艾卡理化亦懂得平衡各方势力利益，两年前欧超联风波，佢就力撑UEFA拒绝参加欧超联，因而获得对方信任，此後欧洲足协自然对PSG大洒金钱「只眼开只眼闭」，可见艾卡理化优秀嘅政治手腕，令佢同PSG可以纵横球坛，谋取最大利益。

全球最有钱王室背後支援 萨勒曼出招喜鹊变凤凰

旧年10月英超老牌球会纽卡素完成惊人易手，掌管球队14年嘅本土商人艾殊利，以3亿镑向36岁沙特阿拉伯王储穆罕默德?萨勒曼全权出售球会股权。

助纽卡素逃离降班漩涡

交易之所以轰动球坛，全因沙特王室被誉为全球最富有，虽然萨勒曼130亿镑个人资产，比起曼城班主文梳亚少，但萨勒曼背後仲有拥有3,200亿镑嘅沙特公共投资基金支持，仲未计算成个王室所有嘅1.3兆镑总资产，喺佢哋面前，其他富豪班主都显得微不足道。

「喜鹊」被收购前成绩差劣，今季长期沦为榜尾分子，「一夜暴富」後为求护级，冬季劲使9,100万镑收购捷比亚及基斯活特等球员救急，成绩随即稳步上扬，逐步逃离降班漩涡。不过今个转会窗行动只属前奏，喺无限银弹供应下，纽卡素下季有望喺市场上大手买入球星。以萨勒曼嘅财力，加上佢喺国际政治舞台及石油世界扮演重要角色，相信「喜鹊」会成为另一支用金钱堆砌而成嘅世界顶级豪门球会。