由车路士转会罗马嘅谭美阿巴谦，今季喺意甲大放异彩，周一(21日)凌晨「罗马打吡」个人梅开二度，带领罗马主场3比0大胜拉素。谭美阿巴谦今季各项赛事攻入23球，打破「战神」巴迪斯图达嘅21球纪录，成为罗马史上「处子球季」入波最多球员。

罗马今场开波56秒闪电领先，谭美阿巴谦龙门口「执鸡」射入，呢位英格兰前锋22分钟展示更精彩射术，门前接应队中传中挂身抽入，加上罗伦素柏历坚尼喺40分钟远距离罚球抽入，罗马就凭上半场3个入波大胜3比0。

罗马教练摩连奴赛後大赞谭美阿巴谦：「我知道佢可以做得更好，唔单止系入球，佢嘅逼抢、战斗、回防都做得好好，我对佢有好高要求，因为我知道佢能力系做得到，只要佢Keep住呢种态度，每场比赛都会有佢份。」