祖云达斯行政总裁艾利华比尼承认，会方决定唔会同前锋保罗戴巴拿续约，意味呢位28岁阿根廷国脚将於今季结束之後，自由身离队，西甲双雄巴塞隆拿同马德里体育会都有兴趣签入保罗戴巴拿。

艾利华比尼话：「球队未来人脚最大变化系唔同保罗戴巴拿续约，呢个决定已经非常明确，随住杜辛华荷域加盟，保罗戴巴拿已经唔系球队计划嘅核心，我哋唔系质疑佢嘅能力，而系仲要考虑好多因素，例如出场率、年龄、合约年期、财政，管理层同保罗戴巴拿倾完之後，大家互相尊重，并作出呢个决定。」

保罗戴巴拿2015年6月由巴勒莫加盟祖云达斯，首季上阵46场入23球，奠定主力位置，但近2季受伤患困扰，状态大不如前，上季意甲仅上阵20次入4球，今季演出亦冇起色，已沦为第4前锋，所以祖记决定放弃佢。

不过，保罗戴巴拿始终有一定名气，早前就传出曼联同利物浦想签佢，依家巴塞隆拿、马体会都加入争夺战，相信佢将会成为今夏转会市场最炙手可热嘅自由身球员之一。