曼联除咗新帅人选之外，仲要解决锋线人脚问题，因为卡云尼好大机会今夏离队，C朗唔锺意踢中锋位置，英国《每日电讯报》指红魔鬼有意今夏签入罗马射手谭美阿巴谦，令C朗可以踢番最擅长嘅边路位置。

24岁嘅谭美阿巴谦上年夏天以4,000万欧元转会费，由车路士加盟罗马之後，表现出色，各项赛事上阵40场入23球，包括上场意甲「首都打吡」个人梅开二度，协助罗马大胜拉素3比0。谭美阿巴谦本身系英格兰国脚，亦喺英超打滚多年，曼联签佢可以「即食」，减少「水土不服」嘅风险。

值得一提，曼联翼锋查顿辛祖同谭美阿巴谦非常老友，可以担任「中间人」游说佢成「魔」。

不过，车路士出售谭美阿巴谦畀罗马，合约中有回购条款，如果曼联要买入呢位射手，相信要先同车仔解决回购条款问题。另外，拿玻里中锋域陀奥森汉都系曼联嘅收购目标。