拜仁慕尼黑面临锋线大地震，除咗盛传射手罗拔利云度夫斯基可能今夏离队之外，另1位前锋基拿比亦有意走人，3大豪门利物浦、祖云达斯、皇马都希望签入呢位26岁德国国脚。

基拿比将於明年夏天约满，拜仁希望同佢续约，但呢位前锋留队意欲不大，并对於转会持开放态度，随即引来各大球会注意。据悉，利物浦领队高普最希望签入同胞基拿比，因为队内翼锋沙迪奥文尼可能今夏离队，基拿比同呢位塞内加尔国脚踢法接近，无疑系最佳代替人选。

至於皇马亦睇中基拿比，甚至有传已经联络佢嘅经理人，商讨签入佢嘅可能性。另外，祖云达斯今季意甲及欧联成绩都未如理想，计划今夏大肆增兵，基拿比成为收购目标之一。

出身於阿仙奴青年军嘅基拿比，2017年由云达不来梅加盟拜仁以来，上阵163场入61球及40次助攻，包括今季入14球及10次助攻，表现出色。不过，如果基拿比拒绝续约，相信拜仁会提早今夏出售佢，以免人财两失。