曼联右翼问题困扰多年，不过新领队坦哈格似乎已迅速搵到出路，球队目前2场热身赛，都系用达洛治同查顿辛祖呢对右路组合，而且表现仲相当对办，坦哈格亦大赞两人喺右路威胁力大，似乎呢对组合将可稳占正选席位。

曼联首场热身赛大胜利物浦4比0，出任右翼嘅查顿辛祖表现突出兼有波入，上场4比1大胜墨尔本胜利，达洛治右路传中亦造就安东尼马迪尔建功，呢位葡萄牙右闸依家已压倒云比沙卡成为正选，佢同查顿辛祖嘅化学作用亦获坦哈格大赞。

坦哈格喺赢墨尔本胜利後表示：「胜利嘅防守好严密，我哋左闸攻势唔系太成功，但系右面就制造咗4至5次非常好嘅机会。成条右路都好出色，查顿辛祖同达洛治联系得好好，加上麦汤米尼、安东尼马迪尔同般奴费南迪斯帮手，但球队仍要进步，将两边攻势平衡。」

曼联星期二(19日)下午会再度出击，喺墨尔本对住英超球队水晶宫，达洛治同查顿辛祖有望继续保住正选位置。