利物浦近年买人眼光独到，但佢哋卖人嘅能力随时有过之而无不及！据报利物浦同格拉斯哥流浪达成协议，将以400万镑卖走中坚宾戴维斯，呢位26岁球星加盟利物浦1年半以来，1次都冇为「红军」上阵，但利物浦转一转手就赚8倍，认真犀利！

利物浦上年1月大闹中坚荒，临急临忙用50万镑向普雷斯顿签入宾戴维斯，不过佢一直未有机会上阵，上季就被外借去锡菲联。格拉斯哥流浪今次用400万镑收购宾戴维斯，取代转投阿积士嘅中坚卡云巴斯，利物浦转一转手就赚8倍。

「红军」近年有唔少高价卖走後备或新人嘅交易，赢尽球迷掌声，好似1,500万镑卖走佐敦伊比、1,900万镑卖走苏兰基、2,350万镑卖利安比维斯达等等。