英超劲旅曼联周日(17日)宣布，球会已就收购利辛度马天尼斯同阿积士达成协议，呢位阿根廷国脚只差体测同工作证就会落实来投，据报转会费高达5,500万镑，成为曼联史上第2贵後衞。利辛度马天尼斯身高只有175cm，将会成为全英超最矮中坚，身型输蚀令名宿里奥费迪南都提出怀疑。

曼联同阿积士周日齐齐发出声明证实转会，据报曼联要先支付4,680万镑转会费，连埋奖金条款总值达到5,500万镑，系曼联用8,000万收购哈利马古尼後，球会史上第2高价买入後衞，呢位24岁球星周薪约12万镑，最重要系佢可以跟番前阿积士教头坦哈格搵食。

利辛度马天尼斯可以胜任中坚、左闸同防守中场3个位置，佢上季喺阿积士都系踢左中坚，加盟曼联亦会主打呢个位置，不过利辛度马天尼斯喺英超有个先天缺陷，就系佢身高只有175cm，将会成为全英超最矮中坚，原本最矮中坚嘅艾斯派古达都有178cm，而且佢喺车路士只系客串性质。

曼联传奇中坚里奥费迪南表示：「体能上佢要预备好面对英超高大中锋，艾宁夏兰特同达云纽尼斯呢啲超过6尺嘅前锋，今季都登陆英超，好似纽卡素嘅基斯活特呢类大只前锋，利辛度马天尼斯嘅身型系咪可以每星期都应付到呢？」

统计显示，今季英超有8位身高超过190cm嘅高大中锋。不过曼联球迷唔需要太担心，事关利辛度马天尼斯强项系组织同传送，而且佢上季荷甲头槌数据唔差，一共录得79次争顶成功纪录，比起哈利马古尼75次更多！