利物浦炒RB莱比锡 纽尼斯大爆发入4球!
2022-07-23 来源: 八一体育 点击
英超劲旅利物浦周五(22日)凌晨喺德国踢热身赛,作客RB莱比锡大胜5比0。今仗主角非乌拉圭前锋达云纽尼斯莫属,呢位8,500万镑射手近2仗连环失机受到批评,但今场後备上阵尽展功架,短短45分钟内食出「大四喜」,领队高普形容纽尼斯已经打开「潘朵拉盒子」,入波将会陆续有来!
利物浦喺亚洲之旅1胜1负,贵价前锋纽尼斯2仗都有空门失机嘅「虾碌」镜头,今仗亦继续先任後备,「红军」开波8分钟就由穆罕默德沙拿入波先开纪录,之後战况出现胶着,直到纽尼斯半场入替罗拔图法明奴,利物浦威胁力即刻大大提升。
下半场3分钟,路尔斯戴亚斯博到12码,纽尼斯操刀射入佢加盟利物浦後第1球,3分钟後再突破越位单刀射成3比0,68分钟纽尼斯接应队友传中小禁区轻松扫入,完场前1分钟佢再喺右路起脚,龙门扑到但甩手畀个网碌入,纽尼斯连入4球率利物浦大胜5比0。
见到新宠大爆发,高普赛後兴奋表示:「纽尼斯已打开潘朵拉盒子,呢场对佢嚟讲系完美赛事。球员都系人,尤其呢一代球员经常玩社交网,当佢哋开头表现失准就会被批评,落场就变得心急,今仗系终止呢啲讨论嘅最佳方法。纽尼斯系球队欠缺嘅前锋类型,系非常出色嘅球员。」利物浦下周四(28日)凌晨会友赛萨尔斯堡,3日後就会喺社区盾对曼城。
相关阅读
- 07-23C朗愿意减薪30% 仲未搵到心仪球会
- 07-23丹尼尔将加盟普马斯 下月倒戈巴塞
- 07-23C朗囝囝皇马Look出现 球迷呼吁皮里兹抢人
- 07-23利物浦炒RB莱比锡 纽尼斯大爆发入4球!
- 07-23【官宣】连格做森林之王 周薪20万镑
- 07-23曼城季前集训有玄机 预视今季成绩
- 07-23全胜不失球 德国完美打入女子欧国盃4强
- 07-23一个字母缺货 巴塞卖罗拔佬波衫倒泻箩蟹
更多>>精选阅读