英冠开锣 升班热门各有隐忧
●般尼扫平货抗群雄
新一季英冠喺嚟紧周六凌晨开打,呢个联赛一向争持激烈,为咗争取升上英超掘金,必定打甩髀,变数甚多,好似上季诺定咸森林事隔23载重返英超,有办你睇,啱啱降班嘅般尼、诺域治同屈福特想做「升降机」,问过其余21路大军先喇。
之前6季都喺英超嘅般尼,上季仅排尾3搞到降班收场,今夏意外地邀请前曼城功勳队长高柏尼执教,呢位曾为「蓝月亮」4夺英超冠军嘅铁衞,充满赢家DNA,佢表示希望建立一支充满正能量、不断赢波嘅球队,杀上英超。
虽然好多球员都踢而优则教,不过唔系个个都咁掂,高柏尼於2020至2022年执教比甲老牌球队安德列治期间,唔单止冇捧过盃,最叻都只系攞过欧协联入场券,92次领军赢得42场,胜率连5成都冇,睇落真系麻麻哋。
最惨系般尼对高柏尼支持有限,今夏更成为「超级市场」疯狂清货,一众当打主力如尼克普比、宾美、达高斯基、弥敦哥连斯及韦格贺斯等悉数「跳船」,特别前4者离队,令般尼冇咗成条防线咁滞,明显系想推倒重来,真系有排执。高柏尼惟有打人情牌,先後签入曼城小将梅里迪、伊根拉利及哈活比里斯,以及安德列治旧部祖舒古伦,配合原有嘅艾殊利班尼斯、积洛迪古斯及韦斯活特,希望以老带新,但要用呢个阵容博升班,难度唔细。
●伯明翰麦斯卢比斯入主创先河
同香港有一定渊源嘅英冠球会伯明翰今夏易主,2007年起控制球会长达15年嘅香港资金出售球会,退出管理层,新班主系前巴塞隆拿前锋麦斯卢比斯率领财团入主,成为首位拥有英格兰球会嘅阿根廷人。
伯明翰2007年被港商杨家诚收购,一度在英超角逐,2011年夺得英联盃後却降落英冠,到今夏落实易主,麦斯卢比斯财团据报以3,650万镑(约3.44亿港元)收购成为新班主,伯明翰即将进入新时代。
38岁嘅麦斯卢比斯球员时代踢过多间球会,曾是阿根廷小国脚,与美斯关系友好。呢位射手挂靴後就变身企业家,对於今次收购伯明翰,他表示是一次重大计划,希望与这个城市及球迷一起成长。
英格兰球坛过往有不少阿根廷外援,最出名首推前曼城射手阿古路,伯明翰亦曾引入费古路亚、萨拉迪等阿根廷球星,但阿根廷班主却是第一个,英国同阿根廷在福克兰群岛战争余怨未消,麦斯卢比斯成为英格兰球会班主,可谓绝无仅有。
●诺域治签森巴新兵耳目一新
诺域治上季排英超包尾降班,呢队「升降机」已习惯喺英超同英冠之间上上落落。会方今夏斥资600万镑收购圣保罗进攻中场加比尔沙拉,对於升班资格志在必得,好可能又会迅速反弹,1年之後英超见。
诺域治多次表演喺英超同英冠之间弹出弹入,例如2014/15年球季降落英冠,该季最後赢出附加赛,获得英超席位,但只系踢咗1季英超又降班。最值得留意莫於过去4季,诺域治两次以英冠冠军身份升英超,但亦两次以英超包尾降班,将「升降机」演绎得淋漓尽致。
诺域治新一季继续由甸恩史密夫执教,呢位51岁主帅上季中途临危受命领军,未能协助球队护级成功,情有可原。甸恩史密夫趁休季期间重建球队,预料会令人耳目一新。特别系签入23岁巴西新星加比尔沙拉,可望提升中场进攻组织力,加上射手迪姆普基仍然留队,呢位芬兰国脚上季英超入11球,踢英冠超晒班。
事实上,迪姆普基曾经两次协助诺域治升上英超,有晒争升班经验。睇番迪姆普基之前踢两季英冠合共轰入57球,诺域治有佢在阵,无疑系升班热门分子。
●哈特斯菲尔德推倒重来难睇好
上季英冠季军哈特斯菲尔德,喺英冠升班附加赛决赛功亏一篑後,今届面临推倒重来嘅局面,领队辞职、主力离队,随时一沉不起。
哈特斯菲尔德喺2017年曾升上英超,经历2季後就重落英冠,但球队未有大规模缩皮,西班牙主帅哥比兰两年前执教後,更走年轻化路线希望再次挑战英超,上季就踢出降班後最好成绩,以第3名身份拎到附加赛资格,可惜喺决赛饮恨而回。
冲击英超失败对球队打击极大,阵中主力唔想再浪费时间喺英冠,两位核心人物路易斯奥拜恩、哈利托夫路即转投升上英超的诺定咸森林,连领队哥比兰亦在7月初宣布辞职,球队已委任过去曾两度出任看守领队的史高菲特顶替。
哈特斯菲尔德放走多位主力後,今季未有适当补充番人手,日本中坚中山雄太以自由身加盟较具睇头,球队入球能力不足问题亦未解决,祖殊高洛马、佐敦洛迪斯等前锋产量偏低,今季要重演上季佳绩将非常困难。
- 07-29【球员分析】─ 森巴足球的边路希望?! Raphinh
- 07-29终极对决-- C罗VS.梅西:Messi与Maradona(三)
- 07-29惨被谢拉特「搣柴」 明斯:以球队为先!
- 07-29普巴伤势比预期严重 随时错过世界盃
- 07-29纽尼斯射中楣 利物浦不敌萨尔斯堡
- 07-29曼联2新兵亮相热身赛大胜 C朗观战後复操
- 07-29英冠开锣 升班热门各有隐忧
- 07-29尤文图斯重镑签下欧洲金童德里赫特!!