完成亚洲、澳洲之旅嘅曼联，周三(27日)立即再安排闭门热身赛，焦点人物C朗拿度亦有在场观战，2位新兵基斯甸艾历臣同利辛度马天尼斯就粉墨登场，结果「红魔鬼」喺卡宁顿训练基地4比1大胜非联赛球会域斯咸，丹麦中场基斯甸艾历臣更射入罚球。

曼联返英国後人脚更鼎盛，除2位新兵基斯甸艾历臣同利辛度马天尼斯报到外，C朗亦由葡萄牙归队，不过佢今场同大部份正选都冇上阵，只系喺场边观战。派出大量新人嘅「红魔鬼」，特别安排华拉尼拍住利辛度马天尼斯镇守後防，领队坦哈格似乎想畀呢对正选中坚组合尽快磨合。

不过今场最抢镜嘅都系基斯甸艾历臣，呢位中场凭招牌罚球入波先开纪录，但完半场前被客队追平。基斯甸艾历臣同利辛度马天尼斯半场退下火线，曼联一众小将反而大踢争气波，加拿祖、阿密特迪亚路同阿历士迪尼斯各入1球，曼联最终大胜4比1完场。

据报C朗返球会後受到队友热烈欢迎，佢观战後立即进行操练，但由於佢之前缺席季前集训，状态远远落後其他球员，所以依家只能够同队友分开练习。曼联下场热身赛会系星期六(30日)对马德里体育会，星期日(31日)再斗华历简奴，有传C朗有机会喺周日一战上阵。