女子欧国盃决赛戏码出炉！德国女足周三(27日)以2比1击败法国女足杀入决赛，8月1号会同「东道主」英格兰女足争夺冠军宝座。

德国女足今场表现突出，队长前锋阿历姗大朴普更加光芒四射，佢喺40分钟接应队友传中射入先开纪录，虽然法国完半场前闪电追成平手，不过阿历姗大朴普76分钟再发威，头槌攻入致胜球，带领德国女足杀入决赛。

阿历姗大朴普今场创下历史，佢目前以6个入波并列射手榜第1位，而且今届5场比赛都有入波，创下女子欧国盃历史纪录。31岁嘅阿历姗大朴普，对上2届欧国盃都喺决赛周前重伤，今次系佢首次参赛，佢赛後表示：「我比往常更加激动，能够喺呢个阶段表现自己令我觉得光荣，我好多谢队友帮忙，冇佢哋嘅传球我唔会入到波。

德国女足同英格兰女足喺决赛争霸，亦系阿历姗大朴普同美迪嘅金靴大战，2人目前同入6球并列射手榜第1位，不过阿历姗大朴普就话：「赢金靴奖唔系我嘅目标，我嘅目标系赢欧国盃冠军！」