西甲劲旅西维尔宣布，球队已同自由身嘅艾斯高达成协议，呢位前西班牙国脚周一(8日)完成体测後就会签约2年。艾斯高今次转会，最大原因系西维尔教练卢比迪古，两人之前已经多次合作，艾斯高深信卢比迪古可以帮佢「咸鱼翻生」。

30岁嘅艾斯高约满皇家马德里後，收到意甲同西甲等多张聘约，但佢最终决定加盟西维尔，佢同西维尔教练卢比迪古关系密切，之前喺西班牙青年军、西班牙国家队同皇家马德里都曾经合作，佢嘅战术一直好适合艾斯高发挥，所以今次转会一拍即合。

艾斯高系西维尔今夏第3签，球队之前已经签入巴西前锋马卡奥，亦向曼联借用巴西左闸阿历士迪尼斯，艾斯高如果可以踢返最佳水准，将令西维尔战力大大提升。