曼联喺英超新球季第1击就输波，球队上下面临巨大压力，领队坦哈格赛後表示有必要再签入新前锋，据报曼联睇中33岁奥地利前锋阿拿奥杜域，呢位前史笃城球星曾被誉为「新伊巴谦莫域」，而且出道初期曾经跟坦哈格搵食，或可救曼联燃眉之急。

曼联主场1比2不敌白礼顿後，坦哈格表示收购前锋系必要：「我唔会开名，呢个暑假已经有250个前锋同曼联扯上关系。我哋本来有2个半前锋，拉舒福特都可以踢，不过佢更加适合踢左边，可惜今场2个正式前锋都未踢得。」

据报曼联依家目标系博洛尼亚前锋阿拿奥杜域，但首次开价750万镑已被拒绝，曼联想要人就要加码，呢位33岁前锋嘅哥哥兼经理人马高证实：「我哋收到一间知名球会嘅斟介，依家同博洛尼亚商讨，睇下有冇机会实现。」阿拿奥杜域喺荷甲川迪出道，当时领军嘅就系依家曼联助教麦卡伦，而坦哈格就系当时副手，所以对呢位前锋踢法并唔陌生，阿拿奥杜域上季喺意甲入14球，宝刀未老。