基利安麦巴比同尼马今季矛盾不断，上仗法甲巴黎圣日耳门对蒙彼利埃出现争射12码纠纷，成为球迷谈论对象，赛後两人矛盾未有缓解迹象，尼马更被发现喺嘲调麦巴比嘅社交帖文点赞，PSG内部召开会议後得出解决方案，就系搵一位具份量中间人调解，而呢个人选，就系沙治奥拉莫斯。

自从麦巴比续约後，传闻佢操球队生杀大权，故被称为「麦总」，有传佢打算今夏踢走合作咗5年嘅尼马，令两人关系破裂，不过尼马亦非省油的灯，拒绝离队後今季大打争气波，先捧法冠盃，法甲开季头两轮攻入3球，打破球会44年纪录，犹如向麦总打面。

麦总上仗对蒙彼利埃先射失12码，又被镜头影到不满队友唔传波畀佢而放弃进攻，下半场博到第2个12码又向尼马争射，但遭尼马拒绝，全场身体语言表达嘅不满路人皆见，而佢同尼马嘅矛盾更系一地花生。

PSG见两位巨星咁落去唔系办法，开会後决定派出调解员协调，希望两位合作咗5年嘅大哥和好如初，而调解员人选就系沙治奥拉莫斯，论资历、夺冠数量同球坛地位，拉莫斯都系全队之冠，而且同两人都冇私交，可以中立同客观地调解双方矛盾，系最理想人选。

经拉莫斯调解後，现时情况已有改善，麦巴比阿妈Fayza LAmari受访时表示：「情况已得到球会内部处理，一切都好。」