周三(17日)凌晨欧联附加赛，由云尼斯达莱带领嘅燕豪芬，作客2比2逼和格拉斯哥流浪，次回合返主场出线形势占优。前曼联领队费格逊今仗特别入场为昔日爱将打气，云尼斯达莱赛後自称教波有费格逊1%咁咋就於愿足矣。

燕豪芬今场有好开始，中场辛加尼37分钟先开纪录，不过主场出击嘅格流，3分钟後由高拉克追平，70分钟再有汤马士罗伦斯射入反超前。燕豪芬落後下未有放弃，78分钟有奥比斯普接应加普助攻近门顶入，两队踢成2比2平手。

费格逊今仗入场为云尼斯达莱打气，呢位昔日荷兰射手赛後表示：「好开心可以畀费格逊睇住我教波，赛前我同佢倾咗阵，佢同佢屋企人都好好，费格逊入场睇我带队系一大荣幸，我喺佢身上学到好多教练嘅技巧。」被问到会唔会有费Sir一半咁成功，「云佬」表示：「我有佢1%咁叻就开心......」