获沙特阿拉伯财团入主嘅纽卡素，今个夏天一直表现低调，不过喺转会窗完结前突出重槌，用破球会纪录嘅6,300万镑收购阿历山大伊沙克，呢位瑞典前锋周四(25日)凌晨已经飞抵英国，成为纽卡素嘅王牌收购。

纽卡素一直希望收购新前锋，近日盛传佢哋接近签入屈福特嘅祖奥柏度，但周三(24日)突然爆出纽卡素同皇家苏斯达倾掂数，以破球会纪录6,300万镑收购阿历山大伊沙克，呢位22岁前锋被誉为「伊巴谦莫域接班人」，前季西甲曾攻入17球，但上季表现跌watt只有6球进帐。

纽卡素周四凌晨英联盃2比1赢灿美尔後，领队艾迪侯域表示：「我哋想增强前锋线，呢个唔系乜嘢秘密，但我唔会讲得太详细。」据Fabrizio Romano报道，纽卡素同屈福特已就祖奥柏度转会达成2,500万镑协议，唔排除会继续完成埋呢单交易。