周六(17日)晚西甲，巴塞隆拿主场以3比0大胜艾尔切，射手罗拔利云度夫斯基又入波，个人梅开二度，但都唔够18岁西班牙新星巴尔迪抢镜，呢位左後衞贡献2次助攻，获教练沙维大赞，成功上位。

巴塞隆拿上半场可以领先2球，巴尔迪功不可没，34分钟佢横传畀罗拔利云度夫斯基射入空门。7分钟後，巴尔迪又喺左路传中，由迪比转身射入。

换边後仅3分钟，罗拔利云度夫斯基把握门前混战射成3比0，呢位34岁波兰国脚今季6场西甲已经有8球进帐，超越1997年嘅韦利，成为近25年以来，首季登陆西甲头6场入波最多嘅球员，亦系巴塞史上首位3次喺西甲梅开二度嘅34岁或以上球员。

巴塞6战有16分亦系球队近5年最佳开季成绩，复兴在望。

赛後巴塞教练沙维特别大赞巴尔迪表现，佢话：「我为巴尔迪感到高兴，1位18岁小将可以踢出呢种高水准，实在令人惊喜，佢可以为球队带来好多贡献，我哋依家有3位一流左後衞，包括佐迪艾巴、马高斯阿素朗。」

照沙维咁讲，巴塞左闸有人满之患，33岁嘅佐迪艾巴已经多次传出可能被球会放弃，巴尔迪崛起，可能加快令佐迪艾巴走人。