周六(24日)凌晨欧国联A3组爆出大冷门，被睇低一线嘅匈牙利凭34岁老将施沙拉尔射入精彩「蠍子式入球」，作客以1比0击败传统劲旅德国，爆出12.5倍客W。

匈牙利赢波之後，领先第2位意大利2分，只要下仗打和意军，就可以晋级明年6月举行嘅决赛周。

德国原本赢波就可以升上榜首，加上有地利优势，理应采取主动，但估唔到开赛17分钟就失守，匈牙利透过1次角球攻势，由施沙拉尔喺近柱背对龙门，用後脚「蠍子摆尾」凌空射入，非常高难度，德国门将达史特根都估唔到佢有此一着，只能望住个波入网。

德国落後之下，表现仍然冇起色，踢咗30分钟先至有利莱辛尼1次射门。换边之後，德国前锋迪姆华拿有1次入波好机会，但射门欠力度，被门将古拉施斯没收。

虽然德国下半场占有较多攻势，但都只系隔靴搔痒，未能创造具威胁攻门，最终输0比1，亦系主帅费历克上年9月接手执教德国以来，领军14场首次输波。

德国5战只有6分，落後榜首匈牙利4分，肯定无法出线，下场对英格兰成为例行公事。