英超劲旅曼联周四(22日)公布2021/22年财政报告，无论亏损同负债都大幅增加，最大原因系球员薪酬开支急升，单系C朗拿度嘅周薪就达到50万镑，令「红魔鬼」成为英超史上最高人工开支球队。曼联总监梅托表示球会今个夏天「使大咗」，宣布嚟紧会「闩水喉」，对领队坦哈格无疑系一大噩耗！

曼联财报显示，球会上季净亏损高达1.15亿镑，比对上一年受疫情影响嘅8,740万镑亏损更多，主要原因系球员薪酬开支急升，3名新球员C朗(50万镑周薪)、查顿辛祖(35万镑周薪)同华拉尼(35万镑周薪)都系阵中最高薪行列，令曼联上季总薪酬开支去到3.84亿镑，打破曼城保持嘅3.54亿镑英超史上最高纪录。

除咗斥巨资买人、支付球员人工之外，炒领队苏斯克查同提前终前兰历克顾问合约，令球会多花2,470万镑嘅遣散费，随住球会不断蚀钱，曼联上季负债增加9,540万镑，总负债达到5.15亿镑！曼联今夏动用破球会纪录嘅2.2亿镑买人，而且又失落欧联赛事，嚟紧一季财政报告都好「危」。

曼联公报财政报告後，总监梅托表示：「我哋夏天对球队阵容作出重大投资，支持坦哈格继续组军之余，亦要确保财务稳定，总括而言，曼联夏天嘅买人计划系比预期中行前好多，未来几个转会窗，我哋唔会预期再有咁高水平嘅投资。」