周六(5日)德甲赛事，拜仁慕尼黑作客3比2击败哈化柏林，喀麦隆前锋祖普莫亭入波唔停，今场又有2个「士哥」，自从佢上个月担正後已连续7场比赛有入球。

拜仁今场开局极佳，穆斯亚拿12分钟先开纪录，状态大勇嘅祖普莫亭喺37分钟同38分钟闪电入2球，为拜仁拉开到3比0，不过拜仁领先3球後突然失魂，完半场前被哈化柏林连追2球，好在下半场及时醒觉，虽然再冇入球，但仍然保持3比2胜果。

祖普莫亭近7场赛事入9球，由於佢同拜仁嘅合约明年夏天完结，据闻唔少球迷都想签呢位喀麦隆前锋，不过呢位33岁老将赛後就派定心丸：「我嘅未来？我只想专注拜仁、专注依家嘅比赛，我非常开心，亦幻想到自己会喺拜仁效力更长嘅时间。」