今届世盃史无前例喺冬季举行，搞到欧洲球季赛程要压缩，增加咗球员体力负担，真系搞出个大头佛，唔少顶级球星及国家主力，因伤错过呢个4年一度嘅盛事，真系伤身又伤心！

中场大脑开刀长抖

尼高路简迪系法国捧上届世盃冠军嘅功臣，但近两年不断出现伤患，特别系今季情况恶化，於8月英超为车路士上阵对热刺一役大腿受伤後，休息超过1个月後复操，点知上月操练时又受伤，结果需要接受手术，长抖4个月。

尼高路简迪以勤力跑动，瞻前顾後见称，属於车路士及法国队嘅中场发动机，佢无缘世盃，对於法国争取衞冕构成重大打击，主帅迪甘斯都话，失去咗简迪，感到好难过。幸好法国中场亦有唔少新星冒起，效力皇马嘅22岁「1亿欧元先生」曹亚文尼，应该系填补简迪正选位置嘅最佳人选。

复操断脚休养半年

韦拿杜姆今夏由巴黎圣日耳门转投罗马，希望争取更多上阵时间，以最佳状态迎战世盃，但却事与愿违，呢位荷兰国脚喺8月一次操练中受伤断脚，需要立即做手术，长抖4至6个月。

韦拿杜姆技术全面，以往效力利物浦及荷兰国家队，都担任重要角色，并不时射入重要入球，「橙衣兵团」缺少呢位中场大将，无疑削弱球队争取佳绩嘅重要本钱，惟有靠法兰基迪庄撑起中场线。另外，韦拿杜姆已经32岁，未必可以参加下届世盃，或者从此告别呢项大赛，对於球员生涯亦系一大遗憾。

伤完再伤缺席整季

保罗普巴亦系法国夺上届世盃冠军主力，但呢位球星过去几年效力曼联期间，表现令人失望，经常受伤缺阵，今季重返祖云达斯，以为可以重生，点知仲衰，7月季前操练期间，因为膝部受伤一直缺阵。普巴选择唔做手术，希望赶及复出踢世盃，但上月复操时，却整伤大腿，继续养伤。

保罗普巴今季仲未踢过正式赛事，就算佢冇整伤大腿，亦未必有足够时间操起状态，依家伤完再伤，可以专心喺屋企睇波。值得一提，曾经爆出普巴请巫师向国家队队友基利安麦巴比落降头，引发内讧传闻，普巴冇份为法国踢今届世盃，反而可能系好事。

提早收咧德军折箭

迪姆华拿经历两季英超失意後，今季决定重返德甲RB莱比锡，就系为咗巩固出战世盃机会，而佢确实交足货，各项赛事已为莱比锡入咗9球，包括近4仗入3粒，搵番对射门鞋。正当华拿重拾信心之际，喺欧联尾轮对萨克达初段，畀对手踢到导致足踝受伤，立即退下火线，赛後更证实左脚足踝韧带撕裂，2022年余下赛事唔使预佢，可谓晴天霹雳，要知道华拿系德国主帅费历克上年接手後成为麾下首席射手，依家冇咗佢真系坚头痕。

阿列沙巴拿加

西班牙门将位置竞争激烈，强如迪基亚连入选大名单嘅机会都冇，28岁嘅阿列沙巴拿加近两年喺车路士长坐冷板，原本都冇乜机会，不过今季突然重夺正选，并且有出色表现，正当以为佢喺世盃前及时「翻生」，点知又因为脚伤而缘尽决赛周，注定佢冇运行。

事实上西班牙领队安历基锺情组织型门将，毕尔包嘅乌尼西蒙稳坐正选，同样打英超嘅大衞拉耶同罗拔山齐士嘅用波能力亦获赏识，阿列沙巴拿加如果想再挑战国家队席位，就要踢番同佢「世界最贵门将」相符嘅表现先得。

列斯占士

列斯占士系近年冒起嘅出色守将，喺车路士有稳定上阵机会，亦系欧联、英格兰欧国盃大军一分子，但佢喺上月欧联撞伤膝头，经过治疗後本来有望复出，不过领队修夫基决定唔冒险而冇份入围：「心碎！由我膝头受伤嘅第1分钟，就知道要踢世盃好抿水，但我觉得仲有机会，所以一直尽最大努力，祝英格兰队友好运，我会尽快回归。」

最唔抵嘅系，佢嘅伤势原本冇咁严重，但受伤後车路士竟然容许佢喺米兰玩多一日，搞到伤势恶化，怀疑系「医疗失误」导致。

中山雄太

柏雷素尔出道嘅中山雄太，2017年当选日职最佳年轻球员，近年放洋欧洲，最初喺荷乙施禾利历练，今季转投英冠哈特斯菲尔德，上阵15场入2球，佢踢过日本多支青年梯队及2019美洲国家盃，可担任中坚及左闸位置。

由於老牌左闸长友佑都已经36岁，中山雄太被视为最佳接班人选，铁定入选世盃大军；偏偏喺世盃决选前夕，对新特兰伤及右脚跟腱，瞓喺担架时双手掩面离场，其後球会官网宣布，中山雄太要紧急做手术，注定无缘世盃。

芝维尔

英格兰喺世盃前出现後防伤兵潮，左闸芝维尔因大腿筋严重拉伤，被迫错过今届决赛周。芝维尔出击力强，助攻力算英格兰数一数二，不过易伤体质就局限佢嘅发展，上年欧国盃决赛周佢都有份入选，但入决赛过程都冇上过阵，领队修夫基甚至宁愿用布卡约沙卡客串左翼衞。

芝维尔今届本来有机会上位，劳基梳尔欧国盃後状态大跌，基尔获加同列斯占士亦伤患缠身，令英格兰闸位人手短缺，可惜芝维尔自己又唔争气伤得仲大镬。勉强安慰嘅系芝维尔只有25岁，仲有机会再冲刺。

柏度尼图

葡萄牙新星柏度尼图系「地狱黑仔王」，呢位22岁翼锋系葡萄牙重点栽培新人，2020年底成为葡萄牙首个「00後」国脚，佢亦喺国家队处子战入波，上位速度极快。可惜柏度尼图喺状态最好时刻，上年4月因严重膝伤要做手术，缺席欧国盃决赛周，原本谂住今届世盃卷土重来，点知10月份因足踝重创，再次要接受手术长抖，同世盃决赛周讲Bye Bye。

喺迪亚高祖达同样缺席世盃下，失去柏度尼图系雪上加霜，不过葡萄牙胜在前线人才济济，除C朗拿度之外，仲有拉菲尔利亚奥、祖奥菲历斯等猛将，锋力有保证。

卢施素

作为一名中场多面手，卢施素无疑系阿根廷不可或缺嘅重心，能胜任边路及中路位置，具备创造力擅於交出致命一传，处理死球有一手，更加系阿根廷主帅史卡朗尼麾下，传波畀队长美斯次数最多嘅球员，有佢分担中场组织工作，令美斯唔使踢得咁辛苦。不过呢位维拉利尔中场於上月尾对毕尔包之役，因腿筋撕裂於初段已退下火线，原本想用保守方法治疗，只系伤势比预期严重，不得不做手术根治，意味住卢施素嘅世盃首骚，要再等多4年。

菲腊比古天奴

虽然近年发展麻麻，但上届世盃有两球进帐嘅菲腊比古天奴，仍算系巴西队常客，由於唔想喺巴塞隆拿长坐冷板，上季季中毅然转投英超中游嘅阿士东维拉博一博，希望确保入选参加世盃席位。点知佢喺上月尾对纽卡素时，整伤右脚大腿肌肉，需要休息6周，加上本身状态一般，今季冇入波又冇助攻，原本视古天奴为後备奇兵嘅巴西主帅迪迪，喺「森巴兵团」人才济济下，最终决定唔拣佢，并未引起太大争议。

迪亚高祖达

利物浦前锋迪亚高祖达都几黑仔，上季已断断续续咁受伤，今季开咧前亦因伤抖咗一排先复出，上月英超大战曼城更正选披甲，表现唔错，点知完场前佢突然按住右脚状甚痛楚，仲要用担架抬出场，佢亦心知不妙。

之後红军主帅高普表示，虽然呢位葡萄牙国脚唔使做手术，但小腿肌肉伤势严重，需要再抖一段长时间，肯定赶唔切好番参加世盃，冇咗佢喺前线嘅窜扰，对葡萄牙同C朗嚟讲，都系沉重打击。