喺冬窗疯狂买人嘅车路士，经过两个星期休息後，主场迎战富咸。全英身价最贵嘅阿根廷新星安素费南迪斯，已经完成注册将会隆重登场，配合上场斗利物浦尽显身价嘅梅迪历，全新嘅「黄金战车」重新出发。富咸近况下滑，射手亚历山大米祖域哑火，而且车仔近8次联赛主场斗富威获6胜2和压倒性成绩，热捧车路士主胜。（Now 621周六凌晨4时直播）

身价达1.06亿镑（约10亿港元）嘅安素费南迪斯，可以胜任中场多个位置，而且系领队朴达最喜欢嘅「Box to Box」球员，喺上年世盃已经充分表现佢嘅充沛体力、广阔嘅球场视野同准绳嘅传送技巧，佢仲可以自己入波，难怪成为世盃最佳年轻球员。

而另一名车路士新兵梅迪历，上场联赛斗利物浦已经後备上阵，入替35分钟已经尽显功架，有速度有技术，可以喺前场创造机会，成条左路畀佢玩晒，有呢两名球星加埋养伤多时嘅列斯占士伤愈复出，既可解决车仔攻力不足嘅问题之余，阵容亦变得更完整。

富咸失射门鞋难爆冷

富咸3个礼拜前主场以2比1击败车仔，取得近17年首场伦敦「富林区打吡」胜利，今场当然想再下一城，希望自1979年（当时为乙组）後首度作客击败车路士，嚟个联赛两循环双杀。

不过自从上场赢完车仔之後，富咸近况下滑，连同英足盃近3场只得1和2负，合共只射入1球，射手亚历山大米祖域脚头无灵，近3场上阵全部无波入，包括对纽卡素主射12码时跣脚，右脚射落左脚弹入，被判入球无效，真系黑到冇朋友，今场富咸睇嚟好难爆冷，车仔主W不容错过。