国际米兰喺欧联前先拎意盃冠军，阿根廷前锋拿达路马天尼斯继续火热状态，佢系球队前线领军人物，理论上系「非卖品」，不过意大利传媒指国米若收到1亿欧元(约8.5亿港元)以上「癫价」转会费，将会同意放人，而车路士「准领队」普捷天奴同马德里体育会教练施蒙尼，都准备斥巨资抢呢位阿根廷同乡。

25岁嘅拿达路马天尼斯，今季各项赛事为国米入24球，据《Italy24》网站报道，国米唔会轻易放走呢位王牌前锋，除非收到「癫价」收购计划，即系1亿欧元以上嘅转会费先会作出考虑，而呢位阿根廷前锋嘅去留，好视乎车路士嘅决定。

据报车路士「未来领队」普捷天奴，已经将拿达路马天尼斯视为夏天收购头号目标，不过马体会教练施蒙尼亦早已计划收购，但佢哋先要将外借车路士嘅祖奥菲历斯卖走(约1亿欧元转会费)，先至可以动用资金抢人，所以拿达路马天尼斯嘅去向，好视乎车路士之後嘅转会决定。