排英超尾2嘅列斯联护级形势危殆，煞科日主场对热刺非胜不可，就算赢波亦要视乎爱华顿同李斯特城嘅成绩先有机会留级。虽然机会渺茫，不过领队艾拿戴斯仍尽最後努力，日前特别请嚟球会两大名宿艾迪格雷同麦阿里士打向全队训话，希望可以制造奇迹。

列斯联上季煞科战亦要踢护级生死战，当时佢哋请到艾迪格雷赛前神秘现身训示，结果列斯联发威赢波，加上护级对手般尼喺另一场输波，得以死里逃生。艾拿戴斯就照办煮碗，煞科战前再请75岁嘅艾迪格雷出席训练，今次仲多埋苏格兰名将麦阿里士打，由两大名宿喺赛前激励球员。

艾迪格雷喺6、70年代曾带领列斯联赢过2次顶级联赛冠军同2次欧洲赛事冠军，58岁嘅麦阿里士打亦喺1992年帮列斯联赢英格兰顶级联赛冠军。