白礼顿嘅「低买高卖」政策非常成功，近年高价卖走宾韦特、古古列拿、丹般恩、比苏马、李安度杜沙特等球星，但成绩未受影响，好似三笘薰、摩西斯卡些度、阿历斯麦亚里士打、艾云费格逊、佩华斯艾斯杜比伦同最新上位嘅安斯素，好多都系喺南美洲或二线联赛入面吸纳。

据《The Athletic》报道，白礼顿买人嘅眼光，有赖班主Tony Bloom旗下嘅数据公司Starlizard，入面有齐全球各地球员嘅详细资料，而且仲有一个「交通灯机制」为引援评级，绿色代表球员系完美符合球队需要、黄色代表接近需要、红色就系尚待观察，精密分析确保唔会「买错人」。最重要嘅系，球员同领队都有机会畀其他球会硬撬，但班主间公司都几难抢得走！

白礼顿锁定欧霸资格後，Tony Bloom表示：「我哋下季可以应付各项赛事，就算有主力离队都冇问题，足球就系咁样，只要价钱合适就可以交易。」据报白礼顿已预计摩西斯卡些度同阿历斯麦亚里士打将高价转会，佢哋1月已由罗沙里奥中央签入18岁中场保拿洛迪，以及瑞典19岁中场艾耶利，被睇好可以喺下季弹起。