甸恩轩达臣早前被曼联外借去诺定咸森林後，以为可以获得重生，点知呢位25岁门将喺热身赛对班士利，踢咗30分钟就受伤，似乎仲未黑完，新一季能否踢出翻身波，实属疑问。

甸恩轩达臣2020/21年球季重返曼联，曾经有不俗表现，但上季受伤病问题困扰，加上曼联正选门将迪基亚表现大勇，令佢仅上阵3次。呢位英格兰国脚早已要求离队，结果7月初被外借去英超新升班球队诺定咸森林。

甸恩轩达臣喺热身赛正选上阵对班士利，但比赛去到30分钟，佢就因伤退下火线，比赛最後打和0比0。据悉甸恩轩达臣嘅伤势并唔严重，领队高柏为咗安全起见，先至换走佢，应该唔会影响8月6日首场英超上阵对纽卡素。