今夏约满祖云达斯嘅阿根廷前锋保罗戴巴拿，虽然受到祖云达斯、国际米兰、拿玻里、曼联同热刺等豪门斟介，不过佢最终选择由摩连奴执教嘅罗马，据报佢周二(19日)会去葡萄牙做体测，完成後会同罗马签约3年，年薪约600万欧元。

现年28岁嘅保罗戴巴拿，周二喺经理人安顿、罗马总监宾图陪同下，坐私人飞机飞抵葡萄牙，完成体测後会即刻同喺当地集训嘅大军会合，罗马更会安排佢着10号波衫，足证对呢位阿根廷前锋嘅重视。

据转会权威记者Fabrizio Romano报道，罗马能够赢出保罗戴巴拿争夺战，全靠教练摩连奴亲自打电话游说，「寸王」向保罗戴巴拿讲解佢喺球队嘅位置、战术，以及罗马嘅发展计划，成功打动呢位阿根廷前锋加盟。