德国女足喺今届女子欧国盃表现神勇，最突出球员非队长兼王牌射手阿历姗大朴普莫属，佢今届4场比赛都有入波，系史上首个喺同一届赛事连续4场入波球员。31岁嘅阿历姗大朴普为德国上阵超过100场，但今次竟然系佢首次出战女子欧国盃决赛周！

近7届女子欧国盃，有6届都系由德国女足赢得，作为球队王牌球星嘅阿历姗大朴普，唔单止冇份捧盃，今届前甚至连决赛周都未踢过。2013年决赛周前，朴普膝部韧带撕裂而缺席，错失同德国女足捧盃嘅机会；2017年决赛周前佢再次半月板撕裂，德国女足就喺8强出局。

对於连续2届决赛周前重伤，阿历姗大朴普话唔会纠缠喺过去：「谂以前系冇作用，我哋要接受现实，将遗憾变为战斗嘅动力，可以出战今届欧国盃决赛周令我非常光荣。」阿历姗大朴普表示德国女足依家实力，比起佢2016年赢奥运女足金牌更劲，有信心可以夺冠而回。