曼联喺季前热身赛成绩理想，亚洲、澳洲之旅4仗拎到3胜1和成绩，虽然C朗拿度转会风波持续，不过领队坦哈格已为英超做好准备，据报开咧战对白礼顿嘅攻击阵容已有定案，安东尼马迪尔、拉舒福特、查顿辛祖同般奴费南迪斯会联手攻肩。

英国《曼彻斯特晚报》报道，曼联上仗打2比2打和阿士东维拉嘅正选攻击阵容，将会系开咧战主场对白礼顿嘅组合，安东尼马迪尔取代C朗担任箭头毫无疑问，般奴费南迪斯亦稳坐进攻中场位置，至於左右两翼就由拉舒福特同查顿辛祖出任。事实上曼联4场热身赛，呢个4人组合有3场都系一齐上阵，只有对墨尔本胜利一仗由艾兰加代替拉舒福特。

曼联新球季进攻组合仲有唔少变数，C朗嘅去留当然系重点，丹麦中场基斯甸艾历臣亦有力竞争正选位置，加上坦哈格仍然希望签入新嘅翼锋，以及艾兰加嘅冒起，正选位置将会系有能者居之。