巴黎圣日耳门(PSG)前锋尼马被球迷称为「影帝」，极夸张嘅碌地动作更系招牌之一，虽然佢曾解释咁做系保护自己嘅行为，不过PSG周一(25日)热身赛作客6比2炒大阪飞脚一仗，尼马就有世界级「插水」表演，博到12码兼亲自射入，但换嚟网民疯狂闹爆。

PSG嘅日本之旅连赢川崎前锋同浦和红钻，周一最後一站对大阪飞脚，沙拉比亚28分钟先开纪录，3分钟後到尼马「表演」，佢喺禁区左路突破急停，瞓身拦截嘅三浦弦太虽然已经缩脚，但尼马喺极轻微接触下成个跳起再碌地，并露出痛苦神情，获球证判罚12码，尼马亲自操刀射入。之後纽奴文迪斯阿历山大、美斯、尼马同基利安麦巴比分别入波，PSG大胜6比2完场。

赛後大批球迷炮轰尼马，批评佢连喺无关痛痒嘅热身赛都要插水：「尼马对任何球队都系咁插水，好公平」、「世界级嘅插水表演」、「连喺季前热身赛都要插水......」