曼城上仗热身赛以1比0击败拜仁慕尼黑，新加盟嘅前锋艾宁夏兰特首次上阵，踢咗12分钟就入波，迅速融入球队，令人啧啧称奇。不过，曼城领队哥迪奥拿认为唔需要大惊小怪，仲话只要系正常人，都可以融入曼城，似乎赞紧自己战术完美，适合任何球员。

哥迪奥拿话：「曼城过去几年表现都非常出色，大家有目共睹，只要签入正常球员，佢哋都可以好容易融入球队。奇云迪布尼可能系球队重要一员，但佢一直好谦虚，佢好开心见到夏兰特加盟，夏兰特一路以来都系1位好球员，做事好踏实。」

至於艾宁夏兰特讲笑话哥迪奥拿份人好疯狂，但自己非常喜欢对方，亦已经准备好迎接新球季。