摩连奴上季帮罗马赢得欧协联冠军，已算好成功，由於罗马未有积极增兵，喺意甲争标希望不大，有消息指摩dad渴望重返英超执教，首选球会自然系车路士。

英国《每日邮报》报道，刚度过60岁生日嘅摩连奴，对於罗马未有加大投资感到失望，因此萌生去意，打算完成今季工作後离队，下一站佢希望重返英超。

摩连奴过去曾两度执教车路士，3夺英超冠军，佢希望第3次执教，其经理人表示，寸王对於车路士任何时段职位空缺都感兴趣，而且其妻儿仍然喺伦敦生活，佢可以随时返伦敦开工。

虽然车路士近日表示继续支持朴达执教，不过摩连奴并非即时返车路士，而系等到球季结束後再商量，到时就有好大讨论空间，事关朴达近期领军成绩甚差，压力甚大，如果到季尾都冇改善，车路士换帅并唔出奇，到时寸王就有机会。