利物浦巴西前锋罗拔图法明奴将於今夏约满，国际米兰打算搵佢过档，然後将表现大跌嘅卢卡古退返畀车路士，据报国米向法明奴开出税後年薪800万欧元，都算吸引。

31岁嘅法明奴效力利物浦8个球季，不过并非常规正选，今季至今上阵21场入9球4助攻，睇数据其实唔错，但佢同红军仲未续约，依家可以同其他球会自由倾转会，今夏将回复自由身。

《米兰体育报》报道，国米就系睇中法明奴系自由身，可以悭番笔转会费，近日提出斟介，开出税後800万欧元年薪条件，其实法明奴现时喺利物浦年薪亦只系税後1000万欧元，意甲比赛环境比英超轻松，国米开到税後800万欧元已算唔错。