车路士从宾菲加以1.21亿欧元破英超纪录天价，签入阿根廷天才中场安素费南迪斯，虽然宾菲加交易中获得巨额转会费收入，但会长雷哥斯达仍然好唔高兴，周五(3日)公开炮轰「安仔」见利忘义，仲话唔想再见到佢！

雷哥斯达表示：「我哋想佢留到今个夏天先至离队，咁样佢唔会有任何损失，但当车路士向佢招手，佢就用唔同方法同宾菲加对抗，包括罢赛、玩失踪，甚至违规离队返阿根廷过新年，根本冇尊重过我哋。」

讲到呢度，雷哥斯达更加火滚：「虽然我哋失去一位出色球员，但我哋只需要尊重球会嘅球员，我以後都唔想再见到佢着上宾菲加球衣！」

雷哥斯达讲道义，不过安仔就唔系咁谂，宾菲加只系佢登陆欧洲嘅一块跳板，车路士向佢开出年薪1000万欧元肥约，为期8年半，见到呢份合约，老窦姓乜都唔记得啦。