皇家马德里周日(9日)西甲输畀维拉利尔後，惊爆费达历高华维迪喺停车场，袭击维拉利尔中场阿历士巴尔拿事件。据西班牙《马卡报》报道，阿历士巴尔拿已决定向警方报案，意味费达历高华维迪会面临刑事诉讼。

据报阿历士巴尔拿被袭击嘅过程都有影片为证，维拉利尔已决定唔会向西班牙足总投诉，而球证报告亦冇纪录呢次事件，所以足总未必会插手。不过维拉利尔就容许阿历士巴尔拿自己决定点做，而佢就选择去警署报案。维拉利尔声明表示：「巴尔拿喺对皇马後，上巴士期间受到袭击，球员已决定向警方报告及投诉，维拉利尔坚决反对一切暴力行为。」

有传今次事件嘅起因，系阿历士巴尔拿喺年初西盃对皇马期间，曾咀咒费达历高华维迪女伴嘅BB「出唔到世」，不过阿历士巴尔拿就喺社交网否认：「喺巴拿贝球场赢波好开心，但同时对自己赛後受到暴力袭击感到伤心，对於外界嘅指控更加好震惊，我绝对冇讲过嗰啲说话！」

除咗面对刑事诉讼外，西班牙反暴力委员会亦有权喺冇人投诉下，主动介入并向费达历高华维迪作出停赛处分。