周三(24日)凌晨西甲联赛，已提前封王嘅巴塞隆拿作客1比3不敌华拉度列，捧盃後连输2场。巴塞教练沙维赛後承认球员捧盃後，难以避免会放软手脚，不过华拉度列执到呢3分就相当重要，喺护级战暂时跳出降班区升上尾4。

巴塞今场开波前获华拉度列球员列队欢迎，佢哋亦「礼尚往来」，开波2分钟就有安达斯基斯坦臣摆乌龙，22分钟主队再靠12码入波领先2比0。巴塞之後虽然想反攻，但74分钟被柏拉达偷袭得手输到3球，罗拔利云度夫斯基完场前破蛋，巴塞仍输1比3，捧盃後连输2场。

沙维赛後表示：「喺目标已经达成(西甲冠军)情况下，要预备呢啲比赛非常困难，出现呢啲战果系因为球员太放松。」巴塞喺头33轮联赛只失11球，但最近3仗就失7球，明显处於等收工状态，而佢哋最後2轮联赛会对马略卡同切尔达。