曼城前锋艾宁夏兰特早前返到挪威，遇到一位身穿曼联球衣嘅小球迷要求合照，夏兰特好大方，有求必应，但就好搞笑出手遮住对方身上嘅曼联队徽，并建议呢位小朋友买过另一件新波衫。

当时艾宁夏兰特先系满足小球迷合照要求，跟住就话：「再影多一张。」原来佢要用手遮住球迷波衫上嘅曼联队徽再影相。合照完毕之後，夏兰特对住小球迷讲：「你不如买件新波衫啦。」

整个过程被人拍片放上网，唔少网民大赞艾宁夏兰特做法非常大方得体，并冇因为小球迷身穿宿敌曼联球衣，而拒绝对方，避免伤害小朋友心灵，同时以幽默方式「抢客」，话唔定呢位小球迷可能会「转会」，由支持曼联，变成曼城球迷。