星级猛将沦为「孤儿仔」 斗快游上岸
欧洲主流联赛夏季转会窗关闭,但仍然有一批今夏约满或者提早解约离队嘅球员未有着落,当中更不乏星级猛将,无奈现时沦为「孤儿仔」等收留。唯一庆幸系自由身球员唔受转会窗时间限制,可以随时加盟新球队,呢班「失业大军」能否尽快游上岸「开工」?
迪基亚应考虑落脚中型班
多数贵价球星「滞留」自由身市场,最大原因都系年龄同薪金因素,唔少球会都会担心,签入嘅球星会出现货不对办。不过西班牙门将迪基亚嘅际遇就令人相当惊讶,呢位32岁球星喺龙门嚟讲,仍然系属於黄金年龄,而且上季先拎完英超「金手套」奖,就算人工唔低,免费签入绝对系单「博得过」嘅交易。
不过迪基亚自从约满曼联之後,虽然曾经一度传出西甲豪门皇家马德里、德甲劲旅拜仁慕尼黑等球队对佢有意,但到最终都系冇晒下文,事实上依家唔少豪门买人,都系倾向拣啲「可持续发展」嘅球员,或者迪基亚要考虑一下退而求其次,搵啲中型班球会进行斟介,甚至系接受沙特阿拉伯球会艾纳斯嘅聘约,同前队友C朗拿度齐齐拍住上。
位置:门将
年龄:32
国籍:西班牙
前度效力球会:曼联
舒米高料转战比甲
卡斯柏舒米高作为将门之後,唔单止成功摆脱到爸爸舒米高嘅阴影,2016年仲协助李斯特城,缔造童话式夺冠嘅奇迹,成就足以名留青史。不过佢一年前突然选择转投尼斯,而且表现麻麻,仲喺近日忽然间同尼斯进行解约,令人相当意外。
消息指,卡斯柏舒米高喺尼斯阵中扮大牌,最终因为不受欢迎而选择离队;依家回复自由身嘅佢,惨变箩底橙。佢嘅恩师、前李斯特城教头罗渣士今季重返些路迪执教,有传有意搵埋佢过档帮手。不过寻晚突然传出,上季喺比甲跌出三甲嘅安德列治,有意开出一年合约畀舒米高,希望帮手巩固後防,冲击联赛冠军。
位置:门将
年龄:36
国籍:丹麦
前度效力球会:尼斯
锺斯叫价过高吓退买家
被香港球迷谑为「一代锺斯」嘅菲尔锺斯,喺未离开曼联之前,仲系当时效力「红魔鬼」时间最长嘅球员,不过佢由於长期受到伤患问题困扰抖多过踢,过去4季只系上阵过6次,今夏约满正式结束12年曼联生涯。
外间盛传菲尔锺斯选择挂靴,但其实喺7月中,传媒指希腊球阿里斯曾有意签菲尔锺斯,并展开斟介,不过菲尔锺斯要求人工太高,令阿里斯窒咗,但球队仍未放弃佢。同时亦指列斯联及菲尔锺斯嘅母会布力般流浪都有意签佢,希望以佢嘅经验,可以帮助到球会争取升班。
位置:後衞
年龄:31 国籍:英格兰
前度效力球会:曼联
夏萨特仅获美职沙特招手
比利时天才中场夏萨特近年饱受伤患折磨,连带身形同状态都一去不返,今夏同皇马提前解约。上年底为比利时出战世盃,不过夏萨特嘅战意似乎已消磨得七七八八,卡塔尔世盃後佢选择退出国家队,今个夏天盛传佢会选择挂靴,但至今仍然未有正式宣布。
夏萨特如果继续征战沙场,相信只会喺二线联赛度效力,美职一直传出有球队想搵佢加盟,而沙特等中东球会亦传出对佢有意。其实夏萨特只系得32岁,如果喺压力相对较低嘅联赛重拾自信,仍会有一番作为。
位置:中场
年龄:32 国籍:比利时
前度效力球会:皇家马德里
苏利安奴或「回家」踢意乙
罗拔图苏利安奴虽然人气唔高,但亦曾有段风光时间,当年喺森多利亚出道时,被誉少数具创造力嘅意大利中场,并曾经晋身国家队,2016年加盟维拉利尔,首季西甲入9球,创出事业巅峰。
不过好景不常,罗拔图苏利安奴其後回流意甲,过去4季都效力博洛尼亚,呢位好波之人经常遭受对手粗野拦截,导致不断受伤患问题困扰,上季意甲上阵27次入1球,最终今夏被博洛尼亚放弃。由於罗拔图苏利安奴身体条件已难以喺意甲立足,好可能重返母会森多利亚踢意乙。
位置:中场
年龄:32
国籍:意大利
前度效力球会:博洛尼亚
保定涉打女友冇人吼
9次德甲、5次德国盃、欧联、欧超盃同世冠盃各两次,呢份CV犀利喇啩?谢路美保定2021年以自由身从德甲班霸拜仁慕尼黑转投里昂不获重用,喺今夏约满就走人。
作为世盃冠军成员,谢路美保定实力不容置疑,但场外表现令唔少球会却步,佢曾经涉嫌打女友,旧年被法院判监18个月,缓刑执行,并要赔偿女友180万欧元。早前曾传出有美职球会对佢有兴趣,但最终只闻楼梯响。
位置:後衞
年龄:35 国籍:德国
前度效力球会:里昂
希拉尔扩军飞起马利加
马利加生涯早期喺法国低组别同突尼西亚联赛度过,直至2015年转战马里迪莫才开始进入球迷视线,2016至21年效力波图5个球季,系佢事业高峰,总计上阵190场入72球,期间两夺葡超冠军,近年佢喺沙特搵食,效力班霸级球队希拉尔,赢过亚冠盃,世冠盃决赛对皇马,马利加都有士哥。
沙特联赛今年大事扩充,罗致欧洲顶级球星,但讽刺嘅系,亦系马利加退场之时,因为希拉尔依家有尼马、鲁宾尼维斯同米连高域沙域,马利加被飞系无可避免。
位置:前锋
年龄:32
国籍:马里
前度效力球会:希拉尔
佩雷拉盼续留意甲搵食
罗拔图佩雷拉2011年由河床转投乌甸尼斯,凭全能踢法打出名堂,可以胜任中场、翼锋、第2前锋,堪称进攻全能战士,2014年加盟祖云达斯,该季上阵52场入6球,效力两季都捧意甲及意大利盃冠军,可惜转投乌甸尼斯「姐妹球会」屈福特,踢过4季仅入16球。
呢位阿根廷国脚3年前重返乌甸尼斯,上季意甲出战34场有5球进帐,但今夏约满不获续约,罗拔图佩雷拉曾经同国米倾加盟但未成事,佢仍希望留喺意甲搵食。
位置:中场
年龄:32 国籍:阿根廷
前度效力球会:乌甸尼斯
杜安薛比脱魔无人问津
杜安薛比曾系曼联青训天才球星,获多项个人奖项,被视为加利尼维尔後第一人,可惜佢上一队後,曼联成绩不稳,佢嘅人生轨迹就同预定目标愈行愈远。
喺长达8年红魔生涯中,杜安薛比曾5度外借,包括3次效力阿士东维拉,拿玻里同史笃城各1次,但都无乜表现,只有2018至19年度代表维拉上阵过30场。上季佢外借到史笃城饱受伤患困扰,全季仅上阵5场,今夏重返曼联最终被坦哈格清洗,到依家都冇班落。
位置:中坚
年龄:25
国籍:英格兰
前度效力球会:史笃城
连格等韦斯咸出手
连格上季以自由身加盟森林被寄予厚望,但全季联赛0入球0助攻,只系1季就被放弃。之前盛传美职华盛顿联队领队、前曼联名宿朗尼有意「拯救」佢,但据闻喺森林??紧20万镑周薪嘅连格,唔肯降人工而谈判失败。
其中一个令连格「吊高嚟卖」嘅原因,系佢原来自8月中已经喺韦斯咸跟操,两年前佢由曼联外借到「锤仔帮」大爆发,而领队莫耶斯早前接受传媒访问时,透露如果连格操番弗,时机成熟会签番佢,所以连格觉得自己「皇帝女唔忧嫁」,拒绝华盛顿联队邀请。又睇吓佢最终可唔可成功落班喇!
位置:前锋
年龄:30
国籍:英格兰
前度效力球会:诺定咸森林
- 09-06[运。视分析]不稳定中的稳定发挥 拜仁主场击退奥
- 09-06星级猛将沦为「孤儿仔」 斗快游上岸
- 09-05「安静的Pogba」 Ryan Gravenberch
- 09-04哈利卡尼哑火 拜仁赢得惊险
- 09-01四面楚歌的地狱主场
- 09-012022/23欧冠8强抽签(上)-无冕王撼三届王
- 08-30哈利卡尼梅开二度 2场入3球闪电征服德甲
- 08-30曼城外借简斯路畀巴塞 半卖半送