巴黎圣日耳门(PSG)球星基利安麦巴比嘅前途问题再有新发展，根据法国《队报》爆料，呢位24岁射手为咗明夏顺利以自由身转投皇家马德里，愿意放弃最多达8,000万欧元(约6.7亿港元)忠诚金，作为对PSG嘅「补偿」，希望会方唔好再阻碍佢登上「银河舰队」。

基利安麦巴比将於明夏约满，佢今夏拒绝同PSG续约之後，双方几乎反面，其後达成协议，「麦总」答应唔会令PSG「人财两失」，但问题系佢并未续约，到底点样可以明夏自由身离队，而PSG又可以获得「收入」呢？

《队报》指原来麦巴比愿意作出「牺牲」，放弃收取最後1年合约嘅忠诚金，大约6,000万欧元至8,000万欧元，加上相关附加费用，PSG可以节省1亿欧元(约8.4亿港元)支出。虽然呢笔金额可能只及麦巴比一半身价，但始终系一笔巨额数目，PSG为咗尽量减少损失，相信会被逼接受。