爱尔兰国家队收到噩耗，近况大勇嘅18岁天才射手艾云费格逊因为受伤退队，无缘出战嚟紧2场欧国盃外围赛大战对法国、荷兰，势必削弱球队抢分机会，亦令想睇艾云费格逊同法国球星基利安麦巴比大斗射术嘅球迷好失望。

艾云费格逊上仗英超上演帽子戏法轰入3球，协助白礼顿以3比1击败纽卡素，被捧为「新哈利卡尼」，但呢位新星不幸喺比赛中整伤膝部，佢返到爱尔兰国家队，接受检查之後，军医认为佢唔适合参加比赛，无奈退队。艾云费格逊今年为爱尔兰上阵4次入2球，佢缺阵对球队打击非常大。

爱尔兰现时喺欧国盃外围赛B组3战取得1胜2负，将於周五(8日)凌晨作客榜首法国，3日之後主场对荷兰。