备受各大豪门垂青嘅纽卡素中场般奴古马雷斯，据转会专家罗曼诺报道，指「喜鹊」快将同佢达成续约协议，有望将呢位巴西国脚留到2028年。

般奴古马雷斯自2022年1月从里昂加盟後，一直表现出色，上季更协助纽卡素杀入前4，因此受到皇马、利物浦、车路士垂青，而佢合约去到2026年到期，其中红军同车仔今夏都试过问价，但被「喜鹊」告知佢系非卖品。罗曼诺指双方近日进行秘密谈判，取得突破性进展，有指纽卡素将会同古马雷斯续约到2028年，并且会加人工至12万镑（约117万港元）周薪，双方接近达成协议，今季多线作战嘅「喜鹊」能绑住呢位中场核心，绝对可稳定军心。