葡萄牙队长C朗拿度出席欧国外对斯洛伐克记者会，公开谈论佢同美斯多年嘅竞争，C朗表示，同美斯嘅竞争已经结束，虽然彼此未有成为朋友，但互相尊重，锺意C朗嘅球迷，冇必要讨厌美斯。

卡塔尔世盃後，C朗同美斯都先後离开欧洲主流联赛，C朗转战沙特，美斯空降美职，C朗坦言两人嘅竞争已告一段落：「憎恨美斯？我唔认为系咁，我哋之间嘅竞争已经结束，曾经系良性竞争，球迷都好喜欢。其实锺意C朗嘅人冇必要讨厌美斯，两个都咁出色，一齐改写历史，亦继续改变。」

C朗认为两人之间最重要系互相尊重：「我哋都受到全世界尊重，佢走佢嘅路，我走我嘅路，大家都咁出色，我觉得竞争唔系对立关系，我同佢同场竞技15年，最後成为咗，我唔系话朋友，我哋互相尊重。」

对於C朗言论，广大网民其实心中雪亮，因为自从美斯去年捧走世界盃後，已经自动成为最佳，两人之间嘅竞争已经分出胜负。