周六(9日)凌晨欧国盃外围赛J组，葡萄牙作客以1比0小胜斯洛伐克，保持5战全胜兼不失球，中场般奴费南迪斯射入全场唯一入球做英雄，但佢嘅前曼联队友C朗就失威，冇入波亦冇助攻，更因为粗野飞铲对方门将杜巴夫卡，被球证出示黄牌，累积够牌数，需要停赛1场，无缘下仗主场对卢森堡，可以提早返沙特阿拉伯备战联赛。

葡萄牙球星如云，包括C朗以队长身份正选上阵，但球队整体发挥欠佳，斯洛伐克上半场创造唔少威胁，包括前锋舒兰斯射门中柱弹出。葡萄牙避过一劫，果然有後福，43分钟由般奴费南迪斯窄角度射入打开纪录。

身为首席射手嘅C朗入球慾非常强，但脚头无灵，6次射门只有3次中目标，错过2次黄金机会，踢到62分钟，佢唔收脚，飞铲门将杜巴夫卡，踢中对方胸口同面部，动作非常肉酸，唔少舆论认为证球应该出示红牌赶佢出场，C朗最终只系食黄牌，但仍然因为已经喺欧国外累积3张黄牌，需要自动停赛1场。

赛後C朗喺社交网话，今场非常难踢，获得重要胜利，球队仍然无敌。葡萄牙排J组榜首，同样榜领先第2位斯洛伐克及第3位卢森堡5分，下仗迎战卢森堡，亦属於关键之战，但C朗停赛，难免影响士气。