英格兰中场祖迪比宁咸今季喺西甲大放异彩，20岁仔已经成为皇家马德里王牌，被睇好系未来「金球奖」人选。西班牙传媒将佢愈捧愈高，最近更因为佢比赛中习惯「伸脷」嘅动作，认为佢同米高佐敦、爱因斯坦等伟人同属「天才」级别！

祖迪比宁咸比赛嗰阵经常不自觉做到「伸脷」动作，西班牙《马卡报》分析，指篮球之神米高佐敦同样有呢个小动作，就连天才科学家爱因斯坦都有经典「伸脷」画面，报道特别由科学角度切入，指人喺高度专注情况下会伸脷，因为伸脷可以大大减少脑部同舌头嘅讯息传输，减轻大脑负担，从而提升专注力。

英格兰右闸捷比亚日前表示，祖迪比宁咸将系带领英格兰首夺欧国盃冠军嘅「天选之人」：「比宁咸可能就系改变历史嘅人，佢咁年轻已经表现得咁成熟，技术同侵略性都非常恐怖，喺皇马嘅表现唔令人意外，比宁咸只会愈踢愈好，最得人惊系佢依家只有20岁！」