有阿根廷球王美斯压阵嘅国际迈亚密，今季未能冲击美职季後赛，不过教练马天奴已准备卷土重来，周四(19日)宣布球会正计划邀请乌拉圭前锋苏亚雷斯加盟，同老友美斯再度合作。

36岁嘅苏亚雷斯早前证实，12月约满甘美奥後将会离队，国际迈亚密喺夏天斟介失败後，将会再次出手，马天奴表示：「我哋为下个球会进行分析，睇下球队有乜需要，当中就有签入苏亚雷斯嘅方案，只要合适嘅时间出现，国际迈亚密就会向呢个方向进发。」

美斯同苏亚雷斯喺2014年至2020年间一齐效力巴塞隆拿，加埋尼马组成着名「MSN组合」，一齐赢过4次西甲冠军，以及喺2015年勇夺欧联冠军。国际迈亚密仲有布斯基斯、佐迪艾巴2位前巴塞隆拿球星，对苏亚雷斯会有一定吸引力。