周日(12日)西甲赛事，巴塞隆拿主场2比1反胜艾拉维斯，呢位西甲豪门今场继续「肉酸赢波」，佢哋开波18秒就失守，全靠罗拔利云度夫斯基及时回勇入2球，惊险反败为胜，教练沙维赛後亦批评球队演出差劣。

巴塞隆拿上场联赛劣势下赢皇家苏斯达，沙维都承认赢得够运，今场佢哋开波即失魂，根度简中场被拍甩後失波，18秒落後系巴塞21世纪主场最早失波纪录。巴塞之後展开反攻，但威胁唔大，好在近况低迷嘅罗拔利云度夫斯基及时醒觉，53分钟接应传中顶入追成1比1，78分钟再射入12码，打破佢自己12年来最长嘅6场入球荒，帮巴塞赢2比1。

连续2场联赛「肉酸赢波」後，教练沙维再次批评球队演出：「讲真我哋状态唔好，踢出一场好难睇嘅比赛，但至少踢番出个性，我相信球队会继续进步。年轻球员好易受到舆论影响，所以我要好好保护佢哋，喺平静环境下搵出改善演出嘅方法。」

巴塞隆拿依家有30分，落後榜首基罗纳4分，差皇家马德里2分排第3位，马德里体育会周一(13日)凌晨3比1击败维拉利尔，踢少1场下累积28分，令西甲争霸出现4强对峙局面。