今晚德盃8强大战，利华古逊主场硬撼史特加。利华歇冬後势头明显放缓，射手邦尼菲斯受伤影响攻力，嚟紧仲有联赛恶斗拜仁慕尼黑後顾，今仗或有所保留，加上两队近年碰头例少交收，入球细有计。（HOY TV 76台周三凌晨3时45分直播）

利华古逊喺沙比阿朗素带领下，今季异军突起，唔单止喺联赛长居榜首，於德盃同欧霸都高奏凯歌。虽然歇冬後4仗联赛录3胜1和，但面对奥格斯堡同RB莱比锡，都系斗到补时先绝杀对手，上仗轻取达斯泰特两粒都系对手太弱，整体嚟讲气势有所回落，主因系射手邦尼菲斯喺上月头鼠蹊受伤，就算避开唔使踢非国盃，佢亦要抖6星期，冬窗借入贝迪斯前锋保查艾利斯亚斯，不过佢今季喺西甲都未开斋，唔多信得过。

而且利华嚟紧周末联赛要火并拜仁慕尼黑，依家佢哋只系领先拜仁两分，呢场榜首大战，随时系今季德甲冠军谁属嘅转捩点，实在太重要，梗系唔想畀机会拜仁後来居上。所以今场难免会分心，随时避重就轻，收起部分主力，只求赢波晋级，唔望大炒。

另边厢，对手史特加都唔系善男信女，依家联赛排紧第3位，不过歇冬後4场联赛只得2胜2负，状态麻麻，佢哋出战盃赛亦稳阵行先，今届3场德盃都保持清白之身，包括2比0击败多蒙特，踢淘汰赛更唔敢冒进。翻查纪录，两军近3次碰头全开2球或以下，今场唔慌多波入。